Поголемиот дел од денот го поминуваме гледајќи во екрани – телефони, компјутери, телевизори. Иако технологијата ни го олеснува животот, нашите очи го плаќаат цехот. Сè почесто во ординациите се појавуваат пациенти со симптоми на „Дигитален замор на очите“ (Computer Vision Syndrome).

Симптоми кои не смеете да ги игнорирате
Ако по неколку часа работа на компјутер чувствувате печење, сувост во очите, заматен вид или главоболка, вашето тело ви праќа сигнал. Кога гледаме во екран, трепкаме до пет пати помалку од вообичаено, што доведува до сушење на солзниот филм и иритација.

Златното правило 20-20-20
Еден од наједноставните начини да ги одморите очите е правилото 20-20-20. На секои 20 минути, погледнете во предмет што е оддалечен најмалку 20 стапки (околу 6 метри) во траење од 20 секунди. Ова им овозможува на очните мускули кои се фокусираат на блиску да се релаксираат.

Улогата на сината светлина
Екраните емитуваат сина светлина која може да го наруши циклусот на спиење и да предизвика замор. Користењето на заштитни филтри или очила со заштита од сина светлина може значително да го намали оптоварувањето. Исто така, важно е екранот да биде поставен малку под нивото на очите и да нема одблесок од прозорците.

Кога е време за преглед?
Вештачките солзи можат да помогнат при моментална сувост, но тие не се трајно решение. Редовните офтамолошки прегледи се неопходни за да се утврди дали зад заморот се крие мала диоптрија која не е корегирана или некоја друга промена на очното дно. Здравјето на очите е клуч за вашата продуктивност. Грижете се за вашиот прозорец кон светот.